Модата е сериозен бизнис

Осврт кон есенското издание на Моден викенд Скопје 2013

Мила Кадриу

Мила Кадриу

Осмото издание на „Моден викенд Скопје“ ја потврди суштинската потреба за постоење на манифестација од овој вид. Модниот викенд стана цврста платформа за промоција на широк спектар активности поврзани со модата во Македонија. Сериозниот пристап на организаторите, прецизно дефинираната програма, адекватната селекција на манекенките и откривањето на соодветен амбиент за модните ревии се квалитет кој веќе е освоен и кој треба да се задржи. Очигледно е дека формата веќе е прифатена од дизајнерите, медиумите и од публиката.

Росица Мршиќ

Росица Мршиќ

На есенското издание на Модниот викенд во Скопје се претставија вкупно 14 дизајнерски имиња и модни куќи, односно, Никола Ефтимов, Бобан Илиевски, Дизел, Олгица Ѓоргиева, Ирина Тошева, „Фешн груп“, Антонија Ристовска, Стилисимо, Стефанија Насеска, Марјана Рујаноска, Никола Петровски, Мила Кадриу, Александра Митковска, Ивана Цветковска и Росица Мршиќ.

Бобан Илиевски

Бобан Илиевски

Кај сите нив се забележа крајно професионален пристап во презентацијата на своите колекции. Стилската разновидност ги шири рамките на модната сцена, додека квалитетот на изработката и емоциите вградени во колекциите ја откриваат вистинската посветеност на дизајнерите. Радува фактот што речиси сите ревии во себе носеа приказна која лесно беше препознаена од публиката. Соодветно внимание беше посветено и на фризурите, шминката и на музиката.

Никола Ефтимов

Никола Ефтимов

Во рамките на Моден викенд Скопје предавање и професионални консултации одржа светски познатиот Мартин Робертс, директор на „Fashion scout London“ и „Graduate fashion week“. Своето предавање Робертс го започна со констатацијата дека модата е сериозен бизнис. Во светски рамки модата со години наназад го има заслужено тој статус. Благодарение на упорноста, креативноста и посветеноста на дизајнерите во Македонија, модниот бизнис се движи во тој правец. Основната функција на „Моден викенд Скопје“ е со својата платформа и понатаму да обезбедува логистички можности за организирано презентирање на новите колекции на дизајнерите.

Vibrazioni by Александра Митковска

Vibrazioni by Александра Митковска

Изборот на локациите за модните ревии во катната гаража „Св. Кирил и Методиј“, во Даутпашиниот амам и во Музејот на град Скопје потврди дека секоја презентација поавтентично ќе биде прифатена ако е поставена во соодветен амбиент.

m Maja Ristevska

Маја Ристевска

Асоцијацијата и моден онлајн-магазин Stylist.mk во клубот и ресторан МКЦ за првпат додели награди за најуспешните на есенското издание на „Моден викенд Скопје“ (FWSK). Главната награда, за најдобра колекција, ја доби креаторката Росица Мршиќ. Признанието за најнадежен дизајнер му беше врачено на Бобан Илиевски, кој работи под брендот „Chic Undercowear“. За најдобра манекенка беше прогласена Маја Ристевска од модната агенција „Мак моделс“. Во мала средина, како што е Македонија, конкурентската борба може да биде контрапродуктивна, но добро е да се развива натпреварувачки дух.

Главната награда од Sylist., за најдобра колекција, ја доби креаторката Росица Мршиќ

Главната награда од Sylist., за најдобра колекција, ја доби креаторката Росица Мршиќ

Пред церемонијата на доделување на наградите, Stylist.mk организираше дебата на тема „Пласманот на модата во медиумите“, во која учествуваа модни дизајнери, новинари, блогери и менаџери. Меѓу говорниците, покрај организаторките Снежана Јаначковска-Богдановска, Катерина Трајановска и Ана Несторовска, беа креаторите Никола Ефтимов, Ненад Секирарски, Лидија Георгиева, Тања Кокев, Антонија Ристовска, Јована Филиповиќ и Ирина Тошева. Дебатата отвори повеќе теми за кои треба и понатаму да се зборува. Активното учество на дизајнерите, менаџерите, блогерите и новинарите  во дебатата го потврди фактот дека сите работат со една заедничка мисија. Крајната цел е да се создаде респектибилна модна сцена која во медиумите нема да биде застапена само во сегментите за популарна култура, туку ќе има сериозно влијание и врз квалитетот на животот на граѓаните во Македонија.

Следниот „Моден викенд Скопје“, кој се одржува два пати годишно, е закажан за пролет 2014 година.

Тони Димков

 

x

Check Also

Поглед на PARTY колекцијата на ZARA

Зара не подготвува за новогодишните и божиќните празници со новата колекција тукушто ...